ما وراء الكواليس

تعالو نرجع كدا زي الافلام فلاش باك يجي 10 سنين.....

المرحلة الاولي: غريب في بلاد غريبة

ربنا رزقني ببنتي سنة 2009 بعد رحلة حمل وولادة قاسية جدااا لا داعي لذكر تفاصلها اعقبها اكتءاب ما بعد الولادة. و كنت مستغربة جدا الكاءن الغريب دا و معنديش ادني فكرة عن كيفية التعامل معاها و دا لاني ولدتها بالخارج  فكنت بعيدة عن الاهل و مكنتش الدنيا سهلة زي دلوقتي في التواصل كل فين و فين مكالمة دولية مختصرة. المهم لما فوقت من اكتءابي ابتديت ادور اعمل ايه معاها. ابتديت اقرا عن المهارات المكتسبة في كل شهر يعني هتتمكن من متابعة صوتي و التعرف عليه و تميزه امتي؟ امتي هتبتدي تسند راسها؟ امتي هتبتدي تعمل تواصل بصري معايا؟ امتي هتبتدي تميز الالوان؟ و هكذا ابتديت اشتري العاب تنمية مهارات تناسب كل مرحلة عمرية الي جانب هوسي بنموها كل شوية اتاكد من الطبيب في خلال المتابعة عن نموها و قياساتها هل هي في المعدلات الطبيعية ام لا ؟ و الحمد لله كانت الامور ماشية كويس و كانت بصحة جيدة لحد لما تمت سنة و شهرين.
و بس بعدها نزلنا مصر و دخلنا علي مرحلة مين اللي طفي النور...😄😄😄.

المرحلة التانية: كله ضرب شرب مفيش شتيمة😂

استقبلنا مصر بالاحضان لكن مصر استقبلتنا استقبال الام الجافية!!!! استقبلتنا بكم جراثيم و بكتريا خلاني اقضي اول سنتين من يوم ززولي بلف ببنتي علي الدكاترة مع انها و احنا برة عمرها ما تعبت او اخدت مضاد حيوي.الحقيقة اتبهدلت بيها بهدلة عمري ما كنت اتخيلها و في وسط القلق و التوتر المستمر كانت كل طموحاتي اني اشوفها بخير و بصحة جيدة بالاضافة اني اصبحت حامل في اخوها لما كان عمرها سنتين و 3 شهور و دخلت نفس الحالة بالظبط اللي حصلت في بنتي و اذيد و الناس حواليا معندهمش غير كلمة واحدة كل لما يشوفوني... بنتك متاخرة في المشي... بنتك متاخرة في الكلام هي ليه بتكلمك باشارات....وديها لدكتور تخاطب. عشت قلق مضاعف عليها و مع ذلك يوم لما كنت بشم نفسي كنت بروح edu fun و اشترلهم العاب و كتب تعليمية فقط بالاضافة للقراءة من خلال الانترنت. بنتي تمت ثلاث سنوات و نصف و عندها دخلت المرحلة التالته.

المرحلة الثالثة: هذا ما وجدنا عليه اباءنا

بنتي مشيت في سن سنتين و 3 شهور في نظر الناس متاخر جداا، و لغاية لما تمت 3 و نصف مكنتش بتتكلم كويس كنت انا بس اللي بفهما و الناس في الحاااح فظيع انها محتاجة تشوف دكتور تخاطب. و انا برفض لاني حاسة ببنتي انها طبيعية و شايفة انها طبيعية لكن الناس حاجة صعبة فعلا. االمهم الناس كانوا بيلحوا علينا انها تروح حضانة عشان تتكلم في النهاية رضخت لالحاح الناس وودتها حضانة كانت بتتعب و بتقعد في البيت اكتر ما بتروح و مشوفتش اي تحسن لازلات مبتتكلمش. و هنا زوجي الح اننا نقدملها في المدرسة في البداية رفضت و بالحاح منه و من الناس الحقنا بنتي بالمدرسة . مفيش شهر و دخلت في تعب جامد جدا اتحجزت فيه في المستشفي و كان التيرم الاول عدي و حصله كمان التيرم التاني و انا كل اللي بعمله هو تطبيق انشطة عامة و معنديش اي رؤية واضحة لتعليمها لكن الحسنة الوحيدة انها اتكلمت كويس!!!!!!!

 المرحلةالرابعة: المراة العاملة

في 2011 اتعينت ضمن تعيينات أوائل الخريجين في مركز بحثي و بعد 6 شهور ابتديت العمل بدوام جزءي و الحقيقة الامور مكنتش ماشية كويس كنت بروح الشغل من 8 و علي 3 بعد الخروج بنعدي علي بنتي و ابني ناخدهم من المدرسة و الحضانة علي الرغم من اني كنت بشتغل بدوام جزءي الي اني استنفذت كل اجازاتي بسبب تعب ابني و بنتي المستمر و لما كنت برجع من الشغل كنت ببقي مرهقة جدا الي جانب واجباتي المنزلية و اني بذاكرلهم كان فيه تحضير ماجيستير و كمان ابتديت افكر في التعليم المنزلي و ان المدرسة مبتقدملهمش تعليم يرقي لطموحاتي . ابتديت احس بضغط عصبي كبييير و اصبحت سريعة الانفعال جدااا و ابتديت انهاار. و هنا كان لابد من اخد قرااار...

المرحلة الخامسة: قرار مهم

قعدت مع نفسي و قولت مش هينفع النظام دا باي حال من الاحوال لابد اني احدد اولوياتي و ارتبهم و لازززم لازززم هضحي بحاجة عشان اقدر استمر فكانت من اهم اولوياتي وقتها ولادي و شغلي و طمعانة بردو في تحقيق الاتنين فقولت لنفسي مين المهم و مين الاهم ؟ مين اللي ممكن يتاجل؟ و في لحظة قررت ان ولادي و طفولتهم مش ممكن يستنوني كل يوم بيكبروا و بيضيع عليا جزء من طفولتهم مش ممكن اعرف اعوضه لما يكبروا. فقدمت علي اجازة بدون مرتب و قدمت طلب باللغاء الماجيستير. و اول مرة اسير ضد القطيع و  مهمنيش من كل اللي وصفوني بالجنون و اني هندم لما ولادي هيكبروا علي تضييع وضعي المهني و الاطاحة بطموحاتي.

ملحوظة...... مش معني كلامي اني بقول للأمهات العاملات لابد تسيبي شغلك و تتفرغي لاولادك ابداااا انا بحكي تجربتي الشخصية فقط... و مفيش حد زي التاني + ان طبيعة العمل بتفرق في عمل بيستنزف جسدك و روحك زي نوع شغلي و محتاج بال رايق و ذهن حاضر و مذاكرة و دراسة باستمرار .و في شغل عبارة عن اعمال مكتبية و ادراية سهل الجمع فيها بين امور كتير .

و اصبح متاح لي وقت اكبر للقراءة و الاطلاع ابتديت اتابع مدونات كتيير و ادخل علي صفحات كتيير و بلاد تشيلني و بلاد تحطني 😄 لغاية لما بقي عندي خلفية معقولة عن ازاي اعلمهم في البيت. اتناقشت مع زوجي ان كفاية كدا مدرسة و تكمل في البيت رفض تماما و قالي انه معندوش استعداد يغامر بمستقبل بنته و بعد شد و جذب كتيير اتفقنا اخيرا علي انها تروح بشكل جزءي المدرسة و اكمل معاهم في البيت. فبقت تروح 3 ايام و الباقي تقعد.

ابتديت انهمك اكتر و اكتر في القراية و متابعة المدونات لدرجة ان في ايام كنت تقريبا مبسبش التابلت طووول اليوم بفرغ محتوي مدونة معينة و هكذااا. لكن للاسف دخلت مرحلة مش لطيفة.

المرحلة السادسة: جلد الذات و التانيب المستمر.

عايز تحير بني ادم خيره. هو دا اللي حصل معايا ابتديت اقري لفلسفات تانية زي و الدورف و ميسون و كمان عجبني نظام الدراسة بال unit و اتشتت و احترت اطبق مين و لا مين و لا مين. لغاية لما استقريت علي خطوط عريضة في كل مادة و ابتديت ادمج لكني في البداية كنت بحط مخطط صاااارم غير قابل للنقاش . يعني انهاردة لاززم اعمل كذا و بوم كذا اعمل كذا و هكذا . و للاسف مقدرتش امشي علي المخطط و ابتديت احس بالفشل و اني مش نافعة في اي حاجة .... ادخل في اكتءاب واقعد بالشهور مبعملش اي حاجة في اي حاجة لغاية في لحظة تجلي قررت اشطب تماما كلمة مفروووض . و التزم تماما ب ( ما لا يدرك كله لا يترك كله ) . وهنا دخلت المرحلة السابعة.

المرحلة السابعة: الخلطة السحرية

من هنا بدات اعمل مخطط بسيط و اطبق بهدوء و بساطة و معنتش بحط اي جداول زمنية بتاتااا. قررت ان دي هتبقي رحلة تعلم ممتع مش مشكلة ابدا تنتهي بنتايج في وقت محدد و من هنا ابتديت احس اني فعلا بقيت اقل عصبية و اكتر مرونة مع ولادي الحمد لله .و اخيرا عرفت ان المهم هو فعلا الرحلة و ليست الوجهه. The journey  not the destination.



  الادوات و المصادر:
تم الاتفاق بيني و بين زوجي علي ان اي مصدر للفلوس بعيد عن ميزانية البيت زي العيديات و خلافة يتم تخصصيصة لشراء كتب و ادوات للاولاد . بس ميمنعش ان في اوقات بتحصل ظروف خارجة بتضرني اني اخد فلوسهم و تتصرف في امور طارئة. و طبعا مبحاولش اشتري اي اداة غير لما بستنفذ كل محاولات ال DIY.

واخيرا هجاوب علي السؤال اللولبي 😃 زوجي و العملية التعليمية:
 الحقيقة هو مش معارض بس في نفس الوقت غير مشارك 😎.