زيي زي كتيير من الناس كنت بربط كلمة روتين دايما بمرادفات سلبية زي ملل كابة رتابة.....و عمري ما فكرت ان الروتين ممكن يكون ليه ايجابيات الا بعد ما صديقتي ثريا رشحتلي كتاب قوة العادات ل تشارلز دويج. و بالفعل قمت بقراءته . و بعد انتهاءي من قراءتة تغيرت فكرة الروتين (سيء السمعة) عندي و ابتديت ادرك ان مش كل الروتين سيء.
يعني ابتديت افهم ان وجود نوع من انواع الروتين في حياتنا ليه منافع كتيير منها انه بيخليك تركز تعمل حاجة و تخلصها في وقت محدد و تتحول لنوع من البرمجة او العادة (الجيدة ) عندك. طيب دا حلو في ايه ؟؟؟؟
حلو انك بتلاقي نوع من الترتيب في حياتك و بتبقي عارف امتي هتعمل ايه مش عايش سداح مداح.
و دا بالتالي بيخليك متحكم في الوقت بشكل افضل و عموما الانسان بيطمن لما بيحس يومه ممكن يمشي ازاي من بدايته بعكس لما يكون مش مخطط له.
كنت بستغرب بنتي علي صغر سنها انها اول حاجة بتقولهالي الصبح بعد صباح الخير هي ..ماما هنعمل ايه انهاردة؟ و لما قريت في فلسفة والدورف لاقيت انه يبيحبذ فكرة وجود روتين لليوم عند الطفل. ففي حاجات بتتعمل الصبح و حاجات بتتعمل بعد الظهر و حاجات تانية بالليل. دا غير ان اليوم بيمشي في ايقاع متناغم يعني مثلا كل فترة دراسة يعقبها فترة راحة او لعب حر . و ان دا مفيد للطفل و كمان معرفة الطفل ليومه متوقع يمشي ازاي من اول لما يصحي لغاية لما ينام دي حاجة بتبقي محببة للاطفال.
و من هنا ابتديت ابقي حريصة قدر المستطاع علي كتابة او رسم الروتين اليومي لولادي.فاصبح يومنا بيمشي كالاتي (دا طبعا في الايام المثالية):
1.اول حاجة بعد الاستيقاظ من النوم دخول الحمام و غسيل الوجه
2.فطار بسيط مثلا زي شاي و كيك او لبن و حبوب الافطار و دا هدفه هو مجرد كسر لعملية الصيام الجزيء اللي تمت خلال النوم زي ما الكلمة الانجليزية بتقول break fast.
3. ترويق البيت و بعض مهام منزلية بسيطة و دي بيساعدوني فيها.
4.Circle time و دا فيه بنقوم بعمل حلقة خلالها بنقول اذكار الصباح و بنتناقش في مخطط اليوم و بننشيد نشيد بسيط و ساعات بنعمل بعض حركات يوجا.
5. Snack time و دا بنتاول فيه كل يوم نوع مختلف من الحبوب مع فاكهة موسمية باللون تبع لون اليوم (هتكلم عن دا بعدين ) علي ان ولادي يشاركوني اعدادها و تنظيم السفرة و ناكل مع بعض و بعد كده يتعاونوا في ارجاع الاطباق للمطبخ.
6. بناخد ال main lesson في المادة المحدد دراستها.
7. فترة لعب حر او رسم لقصة متعلقة بال main lesson اللي تم دراسته.
8. Nature walk.
9.الغداء و مشاركة اعدادة و تناوله.
10. Story time او craft
11. راحة او استكمال لعمل يدوي.
12. روتين النوم من دخول الحمام و غسل الاسنان + قراءة قصة+ قراءة الاذكار.
و دا بيبقي مرسوم و محدد زي الصورة دي ( الصورة من النت).
ملحوظة في كتاب جميل جدااا بنتي حبته لاذكار المساء مكتوب بصورة واضحة و بخط كبير و رسومات ممتعة. الكتاب لكاتبة اسمها ناهد الشوا.
و دي صورة للكتاب.
باءذن الله ناوية اشتري كتاب اسمه صباح الفل لنفس الكاتبة لاذكار الصباح عند توفره باءذن الله. الكتاب اشتريته من مكتبة البلسم.
ملحوظة اخيرة: ال nature walk مبنقدرش نعملها كل يوم فعادة بخللها يوم في نهاية الاسبوع.
دمتم سالمين.
