ابتدينا الدرس بمراجعة سريعة لاجزاء النبات من جذر و ساق و اوراق و زهور و ثمار و تذكرنا احتياجات النبات الاساسية من ماء وهواء و تربة و اشعة الشمس.
بعدها راجعنا علي مراحل نمو النبات و بدايتها البذرة
اثناء جوالتنا في الطبيعة كنا جمعنا بعض البذور
عرفنا ان البذور لها اشكال و الوان و ملمس و احجام و اوزان مختلفة منها الخفيف اللي بيطير عن طريق الهواء . و منها مذود باشواك بتمكنه انه يلتصق بالاسطح التانية و عن طريقها بتنتقل البذور من مكان لاخر و غيره و غيره....
قراءنا في كتب كتير من اجملها الكتاب دا. تقدروا تستعيروه من مكتبة مصر العامة.
عرفنا مما تتركب البذرة و شرحنا بالفعل بذرة نبات الفول . استخدمنا كروت التسمية للتعرف علي اسماء كل جزء من البذرة.
و دي ملاحظات من كراسة بنتي المرة السابقة و من درس البذور
استكمالا لكلامنا عن الماء اتكلمنا اكتر عن السحب و اشكالها و اسمائها.
قرآنا الكتيب دا عن السحب و ابتدينا نعرف شوية معلومات عنها مثلا زي انها مقسمة الي 3 مجموعات بناء علي مدي ارتفاعها من الارض الي سحب منخفضة و متوسطة و مرتفعة.
فادنا كتيرالموقع دا في دراسة السحب.
الماء.
المرة اللي فاتت اتكلمنا عن التربة كعنصر مهم لنمو النبات. انهاردة هنتكلم عن الماء كعنصر اهم لنمو النبات. ليه عنصر اهم؟ لان في نباتات ممكن متحتاجش لتربة عشان تنمو زي النباتات الماءية لكن كل النباتات لا تستطيع الاستغناء عن الماء.
فربنا عز و جل قال في قراءنه الكريم ( و جعلنا من الماء كل شيء حي ). فمفيش كائن حي يقدر يعيش بدون ماء.
فبتدينا نتعرف علي ايه هو الماء؟ و ايه صوره و حالاته؟ و ايه هي دورته في الطبيعة؟
فالماء هو سائل شفاف عديم الطعم و اللون و الرائحة. بياخد شكل الاناء اللي بيوضع فيه. بيوجد في الطبيعة علي 3 حالات بناء علي درجة حرارة المكان المتواجد به. يا اما متجمد (صلب ) زي في القطبين و الاماكن المتجمدة. او سائل في درجات الحرارة المتوسطة. او بخار ماء (غازي ) زي في درجات الحرارة العالية.
فجبنا مكعبات تلج و حطناها في ابريق الشاي ووضعناها علي البوتاجاز و ابتدو يشوفوا تحولها من صلب لساءل و من سائل لبخار(غاز) بيخرج من فوهة الابريق.
لاحظنا تجمع لقطرات ماء في داخل غطاء الابريق و تساءلنا ياتري ايه اللي جاب الماء هنا علي الرغم من ان في بداية وضعنا للابريق مكنتش موجوده. فقولتلهم ان دا اسمه تكثف ( condensation ) العملية دي بتحصل لما بخار الماء(الساخن ) يقابل سطح ابرد منه (غطاء الابريق ) فبيتحول الماء من غاز الي سائل. و دا اساس العملية اللي بتحصل في السحب في السماء.
فبتدينا نتكلم علي دورة الماء في الطبيعة و استعنت بفكرة جميلة شوفتها علي pinterest .
بنجيب كيس شفاف محكم الغلق و بترسم دورة الماء عليه من الخارج بماركر ثابت و بنضع ماء ملون بالوان ماءية لون ازرق و بنقفل كويس و نحط الكيس شوية و هو مفرود في الشمس و بعد مدة هنلاحظ وجود قطرات من الماء في اعلي الكيس و مع ذيادتها بتبداء في التساقط مرة تانية.
فحرارة الشمس بتقوم بتبخير الماء من البحار و الانهار بالاضافة للماء الموجود في عمليات الزفير و ماء النتح في النباتات و التعرق في الكاءنات الحية. فيصعد للسماء في صورة بخار ماء و يكون السحب. و السحب تحملها الرياح و عند وصولها لاماكن ابرد يذداد تكثف قطرات الماء بداخلها و يبدا نزول المطر و هكذا في صورة دورات متكررة.
نفذنا اللي فهمناه بالصلصال مرة
و استمعنا لنشيد بيحكي عن دورة الماء في الطبيعة اسمه حفنة ماء.
قرانا كتب عن الماء بشكل عام زي الكتاب دا. في معلومات جميلة و متنوعة.
و في كتب جميلة كل كتاب كان بيتكلم عن الماء في مكان محدد زي الماء في باطن الارض و في السحب و في جسم الانسان . فاخدنا منهم كتاب كل يوم نحكي عنه.
و ابتدينا بعدها نعرف ازاي الماء بينقي و بيبقي متاح لنا استخدامه في صورة نظيفة و امنة. و دا من خلال قراءتنا للكتاب دا.
اتكلمنا عنها ازاي نقدر نحافظ علي نعمة الماء و ايه مخاطر عدم حفاظنا عليها. و دا من خلال قراءتنا للكتب دي.
اخر حاجة في كتاب بيتكلم عن اهمية الماء عجب ولادي جدا . فيه سجع في كلماته و صوره جميلة.
هنا خلص كلامنا عن الماء. ميعادنا التدونة الجاية باءذن الله عن السحب.
في انتظار مشاركتكم لتجاربكم السابقة او القادمة باءذن الله.
زي ما اتفقنا هبتدي ادون عن دراستنا لوحدة النبات . دي مش اول مرة ندرس نبات لكن اول مرة ندرسه كوحده بكل متعلقاته. فبدراستنا ليه كوحدة اتعرفنا علي حاجات كتير زي التربة و الماء و طبعا اجزاء النبات و الحاجات اللي بنصنعها من النباتات و مهنة المزارع.
فبداية البوست دا هنعرض فيه ازاي درسنا التربة.
اولا ابتدينا نفهم ببساطة ان التربة ( كاحد مكونات كوكب الارض) هي طبقة بتغطي كل انحاء الكوكب حتي في المحيطات فالقاع به تربة. و ان التربة انواع و التربة مقسمة لطبقات و ان في كائنات حية كتيير بتعيش داخل التربة من دود الارض و الجعارين و الارانب داخل انفاقها و الثعابين و كائنات تانية ميكرسكوبية. دا طبعا بالاضافة للنباتات المعتمدة علي التربة فالحصول علي غذاءها من ماء واملاح بواسطة الجذور.كل دا عرفناه من فين؟ من قرايتنا لمجموعة كبيرة من الكتب . دي صور بعض منها.
و بعد لما انتهينا من قراءتها زورنا جناين نتفرج بشكل عملي علي اللي قريناه فالولاد حفروا و شافوا طبقات التربة علي الطبيعة و اخدنا كوباية بلاستيك شفافة حطينا فيها طبقات التربة بالترتيب الصحيح .
اثناء ما كانوا بيحفروا لقوا الدودة دي اخدناها معانا البيت
و بعد كام يوم تحولت لشرنقة. و دي طبعا كانت مثال علي الكائنات الحية المتواجدة بالتربة و عرفنا ان في كائنات حية كتيير بتساعد في عملية التحلل ( و هو تحويل المواد العضوية الكبيرة لمركبات بسيطة بتشكل مغذيات مهمة لنمو النباتات) و كمان بناءها لجحور داخل التربة بيساعد علي تهوية التربة و امداد الجذور بالهواء.
بعد رجوعنا كان معانا كيس فيه تربة و كنت شارية مجموعة بذور زي الشبت و البقدونس و الجرجير و الفجل . قمنا بتوزيع التربة علي اكواب بلاستيك شفافة (عشان يقدروا يشوفوا و يتابعوا نمو الجذور داخل التربة ). و بدانا بزراعة البذور و تولوا ريها كام يوم لغاية لما نبتت و طولت شوية.
و دا شكلها دلوقتي بعد لما نقلناهم لاصيص زرع اكبر
و بعد الانتهاء من دراسة التربة لخصنا كل المعلومات المهمة اللي استفدناها بعمل كتيب صغير عن التربة.
ملحوظة: الكتب جزء منها بتاعنا و الباقي كنا مستعيرنه من مكتبة مصر العامة.
هنا خلصت تدوينتا عن التربة و اشوفكم علي خير باءذن الله في التدوبنة اللي جاية عن الماء.
متنسوش تشاركوني تجاربكم عن التربة 😉
